كتبت كريستينا فخري في موقع “بيروت”
كتار من المشاهدين متفقين إنو “من أحلا بيوت راس بيروت” كان من أروع المسلسلات المحلية يلي تركت أثرا بذاكرتنا. شكل علامة مميزة بالدراما اللبنانية مع عرضو ببداية الـ ٢٠٠٠ من خلال حبكتو المتينة وأبطالو الرائعين. وإذا بدكن تعرفوا وين صار شخصياتو الرئيسية بعد كل هالسنين، فهالبوست أكيد مخصصة لإلكن.
فيكن كمان تسمعوا الجينيريك، هالشي رح يخليكن تحسوا من أول وجديد بالأجواء الحلوة.
نجوى (رندا كعدي)
قدما بياع عالساحة الفنية بعمر كتير زغير. أثرت بالجمهور من خلال دور الإم المضحية والدايرة بالا عولادا وبيتا من بعد وفاة زوجا. لعبت بعدين أدوار مهمة بعدة مسلسلات، مسرحيات وأفلام محلية.
سامي (زياد نجار)
الصبي المشاغب بالتمثيل مانو هيك أبدا بالحياة العادية. نجار تخرج من جامعة الألبا وصار مخرج مستقل بجدة، بالسعودية.
رودي (سامر أبي رزق)
دوب قلوب كتير صبايا من بعد إطلالاتو التلفزيونية الأولى. أبو رزق كمل درسو وحصل على ماجيستير بالسينما والتصوير السينمائي / المسرح الموسيقي من جامعة الألبا. نفذ أكتر من 30 عرض موسيقي ومسرحي للأطفال خلال الـ 15 سنة الأخيرة تحت إشراف شركته الخاصة “لونا غروب”.
لمى (لمى نجار)
عالتليفيزيون هي إخت رودي والبنت يلي عقلا كبير. بالحياة، إختو لزياد، وطبعاً هني تنيناتن ولاد كاتب المسلسل مروان نجار. درست الدراما بجامعة كاليفورنيا من بعد حصولا على درجة البكالوريوس بالعلوم السياسية من الجامعة الأميركية ببيروت سنة 2001.اشتغلت مؤلفة عند ليو برونيت، وهلأ عم بتعلم مسرح ببرمانا هاي سكول.
فادي (سيزار ناعسه)
الصبي الزغير والطيوب تبع “من أحلا بيوت راس بيروت” كبر وصار شب. هوي اليوم مؤلف موسيقي مستقل ومغني باس. حاصل على درجة الماجستير بعلوم الموسيقى من جامعة الروح القدس – الكسليك وإلو طلات خجولة بالدراما اللبنانية.
شيرين (جيهان أرسانيوس)
بتتذكروا البنت السمرة يلي كانت على علاقة مش منيحة ببيا. دورا كان جزء أساسي من القصة. عايشة بالدوحة – قطر، وكانت مقدمة سابقة لبرنامج على قناة الأطفال “جيم” التابعة للجزيرة.
رانيا (ميرنا دالي)
رانيا أول حدا سكن ببيت راس بيروت المشهور. إما عطيت الفكرة لنجوى بالحلقة الأولى حتى تحول بيتا الكبير لسكن للطلاب. دالي كفت بمجال الإعلام من بعد التمثيل، واشتغلت بشكل رئيسي مع ستوديو فيجين.
ريم (رندا علم)
لعبت بالمسلسل دور البنت المضطربة. كملت درسا بجامعة روح القدس – الكسليك، وانتقلت من بعدا لتشتغل ورا الكاميرا. صارت وحدي من أشهر المخرجين البنات ونفذت خلال مشوارا أعمال لألمع النجمات العربيات متل نوال الزغبي نجوى كرم وسيرين عبد النور.
